Komið að því!

Við erum að fara í FERÐINA!  Förum suður á eftir og síðan út á sunnudaginn.  Blogga þegar ég kem heim. 

Afmælisveisla, sjómannadagur, stefnumótunarfundur og mótorhjólapróf.

Allt þetta hefur verið á döfinni í júní.  Á fimmtudagskvöldinu fyrir sjómannadagshelgi fórum við á Þorpið að hlusta á bræðurna Adda og Unnar ,,trúbadorast" og um 23.00 trítluðum við svo yfir til mömmu og pabba. Gugga, Gunnar, Anna María og Valgarð komu auðvitað vestur.  Þau komu rétt fyrir miðnætti 29. maí og svo varð Valgarð 12 ára þann 30. maí og var afmælissöngurinn sunginn og kaka í tilefni dagsins hjá ömmu Svanhvíti og afa Ragnari kl. 24.00. Það var sem fyrr mikil hjálp í þeim hjónum Guggu og Gunnari fyrir undirbúning afmælisveislu Skjaldar eins og við var að búast! Svo er líka svo gaman að fá þau í heimsókn!

Á föstudagskvöldinu voru tónleikar í FHP og var Guðný Gígja að troða upp þar.  Hún var flott eins og alltaf.  Lilja Sig frumflutti svo nýja sjómannadagslagið sitt ásamt öðrum lögum við góðar undirtektir. Flottar stelpur! Sverrir Bergmann tróð líka upp en við höfðum ekki tíma til að hlusta á hann.

Á laugardeginum kl. 18.00 var ég síðan með hóp af krökkum með stutt opnunaratriði Hafstrauma í Perlufiski hjá höfninni. Það má sjá bút af því hér: http://youtube.com/watch?v=5zNM_ydQcB4. Svo má ekki gleyma nýja bílskúrsbandinu á Patró, sem Pálmi Snær er í, JÚGURSMYRSL, þeir komu, sáu og sigruðu á tónleikum á höfninni. Það má sjá hér: http://youtube.com/watch?v=OqSYjcAPrak

Afmælisveislan hans Skjaldar var haldin á laugardeginum kl. 20.30 og mættu margir og skemmtu sér vel.  Það var sungið og trallað og borðað og talað og drukkið og hlegið.....voða gaman.  Ég ætla að setja fleiri myndir inn fljótlega. Svo var farið á ball í FHP með sjómannadagshljómsveitinni Sólon. Það var rosalega gaman og allir skemmtu sér konunglega. Það verður þó að viðurkennast að það var gott að fara að sofa þegar heim var komið. Við vorum þreytt en sæl. 

Á sunnudaginn var frágangur og síðan fór ég á ball með Pálma Snæ um kvöldið.  Við vorum nokkur á ,,foreldravaktinni" og höfðum gaman af því að fylgjast með ballgestum og hlusta á Spútnik.  Ég og Dóra tókum nokkur spor við nokkur lög en vorum ekkert að missa okkur í stuðinu.

Þann 11. og 12. júni komu starfsmenn Fræðslumiðstöðvarinnr hingað á Patró á stefnumótunarfund.  Hluti af stjórninni kom líka.  Það gekk allt vel, gott var að hitta samstarfsfólk mitt augliti til auglitis.  

Svo er það rúsínan í pylsuendanum í bili a.m.k...........ég tók mótorhjólaprófið í gær og það gekk bara ágætlega. Svo nú er bara að æfa sig!

 

 

Ferðin á Snæfellsnes

tókst með eindæmum vel. Við fórum yfir Breiðafjörð með Baldri kl. 18.00 á föstudaginn og keyrðum síðan frá Stykkishólmi í Gufuskála. Við vorum ellefu, þar af þrjár konur.  Dóra Birna, Sólveig og ég. Við vorum fínt hnakkaskraut.  Þetta var fyrsta ferðin okkar Dóru og við stóðum okkur vel, vorum ekkert hræddar . 

Það fylgir því einhver frelsistilfinning að aka um á mótorhjóli, kannski svona svipuð tilfinning og sú sem þeir upplifa sem hafa gaman af því að fljúga. En mér finnst að ég verði að hafa fasta jörð undir fótum, nýt þess ekki að fljúga um loftin blá.....ekki ennþá a.m.k......... kannski seinna.

Við fórum á laugardagsmorgninum að Arnarstapa og þaðan á hjólunum upp að jökulrótum.  Síðan fórum við á snjósleðum upp á jökultopp.  Það var rosa gaman en við sáum því miður nánast ekkert yfir því skyggni var slæmt.  Ég ætla að fara aftur seinna því að það er svo fallegt þarna.  Þá velur maður góðan dag til að sjá vel yfir. 

Frá Arnarstapa keyrðum við sunnanmegin á Snæfellsnesinu að Vegamótum og þaðan yfir Vatnaheiðina..........í rigningu.  Það var ekki svo slæmt nema ég var ekki í nógu vatnsheldum galla, blotnaði því í gegn og var kalt. 

Þegar komið var yfir Vatnaheiðina ákváðum við að skella okkur í Bjarnarhöfn til að spjalla við hann Hildibrand, sem er frábær, skoða safnið og fá okkur hákarlsbita.

Frá Bjarnarhöfn lá leið okkar aftur í Stykkishólm og hafði Maggi Jóns pantað gistingu í heimagistingu Ölmu. Þar var gott að vera. Snyrtilegt og indælir húsráðendur.

Dóra var búin að panta fyrir okkur borð á Narfeyrarstofu um kvöldið og fengum við dýrindis máltíð og góða þjónustu þar.

Kl. 15.00 á sunnudeginum var síðan lagt af stað yfir Breiðafjörðinn heim á leið.

Þetta var frábær ferð og ég verð að segja að hún varð til þess að ég hlakka enn meira til Skotlandsferðar okkar.

Hætt hjá Grunnskóla Vesturbyggðar og Grunnskóla Tálknafjarðar

og er bara í Þekkingarsetrinu núna, 80% hjá Fræðslumiðstöð Vestfjarða og 20% Vinnumálastofnun.  Það verður að segjast eins og er að það er léttir.  Ég get þá einbeitt mér að nýju vinnunni og hlakka bara mikið til. 

Ég var að setja inn myndband af Gígjunni minni og vinkonu hennar sem tóku þátt í söngkeppni framhaldsskólanna í Flensborg í vetur.  Endilega skoðið.  Þær eru flottar.

Það var fínt í golfferðinni.  Þó aðeins of stutt ferð fyrir minn smekk.  Maður var nú ekkert að lækka sig í forgjöf núna en það kemur kannski í sumar.

Ég er að klára æfingaaksturinn í þessari viku og tek mótorhjólaprófið eftir næstu helgi.  Þetta er svoooo gaman.......ég sé pínu eftir að hafa ekki gert þetta fyrr.  Ég er voða stirðbusaleg og stundum pínu skelkuð en þetta er allt að koma